Ich Ruedolf der Schifer vnd mein hausvraw ver Anna vnd all vnser erben veriehen vnd tuen chunt alli den di den prief sehent oder horent lesen, daz wier Seidlen vnd Steffan paiden pru^edem von Geiselhaim vnd ir paider erben versaczt haben vnser gu^et daz gelegen ist ze Vntersteten pei dem nidern gatern, da Maertein zu der selben zeit auf sazz, mit alli den nutzen die darzue gehorent, auf di liechtmizz di nu schirst chumt, also mit der weschaiden, swan wir vnser guet vmb di vorgnanten zwelif phunt phenning lo^esen weln da wir in vnser vorgnantz guet vmb versatz haben, daz schul wir lo^esen all jar ja^erleich vor liechtmizz viertzehen tag oder hin nach viertzehen tag vnd dez schuln si vns auch nicht ierren, si schuln vns all jar jaerleich ze lo^esen geben vnser vorgnantz guet ze Vntersteten vmb di egnanten zwelif phunt phenning, auch schuln wir dez egnanten guets ze satz ir gwer sein an alli der stat vnd in dez not geschiecht. Wer auer datz in an der gwerschaft dez satz auf dem gu^et icht abgieng, daz schuln si haben datz vnsern treuen vnd auf alli der hawe di wir haben, versuecht vnd vnuersuecht; vnd wa^er daz si irr pfening auf dem egnanten satz nicht verziehen mo^echten, so schul si vns di lo^esung auf dem egnanten guet an notten, vnd wa^er daz wir nicht mo^echten noch welten lo^esen, so schuln si daz vorgnant guet setzzen vmb di egnanten zwelif phunt pfening wem si welnt. Vnd daz in vnd auch vns daz also sta^et vnd vnzebrochen peleib, dar vber gib ich egnanter Ruedolf der Schifer den egnanten Seidlen vnd Steffan von Geiselhaim disen prief versigelten mitt meim anhangenden insigel, alis daz sta^et ze behaltten daz oben an dem prief verschriben sta^et. Der prief ist geben do mann zalt von Christus gepurd dreutzehen hundert jar darnach in dem siben vnd fvmfzigisten jar an sant Aiten tag.

Source Fulltext: OÖUB 7 (Wien 1876), S. 488f., Nr. 482