Wir Albrecht von Gots gnaden hertzog ze Oesterreich, ze Steyer vnd ze Kernden veriehen vnd tun chunt, als wir mit dem hochgeborn fu^ersten vnserm liben oeheim hertzog Albrechten von Payrn vnd mit seinem rat ainen tag genomen haben von des geltes vnd der pfantschaft wegen vmb Scherding, daz wir vnsern getrewen liben Eberharten von Walsse hauptmann ob der Ens vnd Eberharten von Chappellen die wir an vnserr stat auf denselben tag senden, vollen gewalt vnd gantze macht gegeben haben vnd geben ouch ze teidingen von vnsern wegen vmb dasselb gelt vnd vmb die obgenanten pfantschaff. Vnd waz si darinn teidingent, daz ist vnser will vnd wellen ez gentzlich stet haben mit vrchund ditz briefs. Geben ze Wienn an pfintztag in den vier tagen in der vasten. Nach Christs gepurd drewtzehen hundert iar darnach in dem siben vnd fünftzigisten iar.

Source Fulltext: OÖUB 7 (Wien 1876), S. 491, Nr. 484