Wir Albrecht von Gottes genaden herczog ze O^estereich ze Steir vnd ze Krain vnd ze Kernnden tun kund vmb die lehen gelegen ze Retz vnd vmb Hardegkch vnd wo sy in der herschafft ligennt, die in crieg gewessen sind zwischen den edlen vnsern getrewn lieben graf Pu^erchart von Maidburg vnd seinen vettern an ainern tail vnd graf Fridreichen vnd graf Vlreichen von Schawnberg vnd jren vettern an dem andern tail, das vnser herrn die zw der zeitt bey vnns waren, darv^eber erfunden vnd ertailt habent, es solten die vorgenanten von Schawnberch dieselben lehen besta^etten. Die habent das getan vnd habent die vorgenannten lehen besta^ett mit ir starken eyden, das sy vnd ir eriben vnd voruodern gelichenn haben, ee das die halb vest Hardegk in ir gewalt mit kaw^effen ye ko^em, vnd sullenn auch die hewt ze tag leihen vnd hab sy auch graf Hainreich saliger von Schawnnberg vnd sein voruodern gelihen vntzt an sein ennde. Dauon wellen wir, das die vorgenannten grauen von Schawnberg bey derselben lehenschafft beleiben an all irrung, als sy die vor vnnser besta^ett habennt vnd als in das mit frag vnd mit vrtail geuallen ist an alain vnuerzigen, was die Jungen von Maidburg rechtns haben von ir muetter wegen, da sullen sy beleiben. Des geben wir ze vrchund disen brief versigelten mit vnserm insigl. Geben ze Wienn an sambstag vor dem suntag Inuocauit nach Kristi gepurd drewzechenhundertt darnach in dem siben vnd funfzigisten jarenn.

Source Fulltext: OÖUB 7 (Wien 1876), S. 493f., Nr. 486