ICH V/elreich der Tolperiger vnd ich Katrey sein hausfraw wier vergehen offenlich mit dem brief mit sampt allen vnsern erben vnd tu^en chunt allen den di in ho^ernt sehent oder lesent, das wier mit wol bedachtem mv^et vnd mit gu^otleichen willen vnd wart aller vnser erben recht vnd redleich ze chauffen geben haben V/elreichen dem Hager vnd seiner hausfrawen Christein vnd iern payden erben vnser gu^et genant auf dem Aygen vnd gelegen ze Chirichsteten nyden in dem dorff in Offtheringer pharr mit allen den ern rechten vnd nv^etzzen vnd darzu^e geho^ert versu^echt vnd vnuersu^echt, aws vnser nvtzz vnd gewer in ier nvtzz vnd gewer, vnd dez drew tail aygen sint von dem grycht ze Scho^ewnberch vnd das viertail recht lehen von hern Jansen von Traw^en; vnd daz haben wier in gegeben vmb ein gellt, des wier gar vnd gancz von in verricht vnd gewert sein also mit awsgenomer red, das wier vnd vnser erben des vorgenanten gu^etz Vlreichs des Hager vnd seiner hausfraw^on Christein vnd ier paider erben recht gewern schv^ellen sein swo in des not geschiecht, also lancz recht ist ob der Ens. Wa^er das in an der gwerschaft icht ab gieng, swaz sev des schaden na^emen, den schu^ellen sev haben dacz vnsern trewen vnd auf aller vnser hab di wier haben. Wier vergehen auch, ob fu^erbas yemant herfu^er chaem der pezzer erib wolt sein zu dem obgenanten gu^et vnd der das haben wolt, der schol iz lo^esen von Vlreichen dem Hager vnd von seiner hausfrawn vnd von iern erben vmb sechtzk pfunt phenning allter wienner mv^enzz, an waz sev darauf mawrten oder darauf zymmra^echten, daz schol in besunderleich vergollten werden nach vier manne rat an geva^er. Wier schu^ellen auch vnd vnser erben nach dem vorgenanten gu^et noch hincz Vlreich dem Hager noch hincz seiner hausfrawen noch hincz iern erben chain ansprach nymmer mer nicht haben noch sv^ehen weder mit recht noch an recht, daz haben wier in verhaizzen mit vnsern trewn. Vnd darvber ze ainem warn v^erchu^end gib ich V/elreich der Tolperger in den brief fu^er mich vnd fu^er alle mein erben versygellt mit meinem anhangvnden jnsygel, vnd ze ainer zevgnv^ezz mit meins lieben o^ehairn Fridreichs des Chrezzling anhangvnden insygel yem an allen schaden. Der brief ist geben nach Christes gebu^erd v^eber drewtzzehen hvndert iar vnd dar nach in dem syben vnd fu^enfczikisten iar an sand Marks tag.

Source Fulltext: OÖUB 7 (Wien 1876), S. 500f., Nr. 493