Ich Heinreich chorherr ze Pazzaw vnd techent ze Ens vergich offenleich mit disem brif für mich vnd mein nachchömen techent vnd verweser ze Ens ze haben mess drey tag in einer igleicher wochen auf sand Johanns Baptistes alter in der pharrchirichen ze Ens, wan der erber vnd beschaiden man Chunrat der Deussal purger ze Ens vnd vrow Elspet sein hausfraw durch Got vnd ier sel hail gegeben haben der pharrchirichen ze Ens vnd iern verwesern techenten da selbs iers rechten purchrechten zwen weingarten gelegen ze Emmerstorf vnd ainen akcher da selben vnd ain phunt geltes dacz Ens auf ainer pro^etpanch, vnd ist diew ander panch, als man von der chirichen an den markch vnder die pro^etpench get vnd leit geleich gen der smitstrazz, vnd do man von dient all jar sechs phenning vnserem herren dem herczogen ze marchrecht vnd nicht mer; vnd auch daz noch müeten ze pezzeren nach ier staten, verhaizzen ich iem vnd verpind mich darvmb drey tag in einer igleichen wochen mess ze haben auf sand Johanns Baptistes alter in der pharrchirchen ze Ens vnd da Got für in sein hausfrawen vnd vmb ier vodern vnd nachchomen sel fleizzichleich pitten vnd ier gedenchen. würd aber daz versaumpt von dhainer sach wegen daz di mesz nicht gesprochen würden in ainer wochen, so sol man si erstaten in der andern wochen mit als maniger mesz als versaumpt ist. Geschaech daz nicht in der andern wochen, so sol der techent oder wer sein verweser ist geben ze pezzrung in der drytten wochen ein phunt wahsz ze dem lia^echt auf denselben alter, vnd sol di mess dannoch erstatten vnd schol di pezzrung geschehen als oft di säumung geschiecht. wolt aber ein techent di mezz ablazzen vnd nicht wegen, so sol vnser herr wer pischolf ze Pazzaw oder wer sein verweser ist darze no^etten als sein bestaetig brief darvber sait. Vnd des ze v^orchu^end gib ich disen brief für mich vnd für mein nachchomen versigelt mit meinem vnd mit des erbern maister Fridlibs chorherren ze Pazzaw anhangunden insigeln. Datum in Anaso in die natiuitatis beate Marie virginis anno dominj millesimo tricentesimo quinquagesimo septimo.

Source Fulltext: OÖUB 7 (Wien 1876), S. 529f., Nr. 520