Ich Hainreich von Wartenuels vnd ich Jans von den Winden sein pru^eder vnd alle vnser erben wier veriehen vnd tu^en chvnt an disem offen brief allen lawten, daz vns vnser pru^eder her Jans von Wildungsmawer gemacht hat mit herren hant seine lehen datz Taelesprune vnd datz Czankendo^erf vnd datz Neydeck also beschaidenleich, wer daz daz er vnder wegen stu^erbe auf der vart die er vert vber mere vnd nicht wider chom, dez Got nicht engebe, so schulle wier vnd vnser erben vnuerschaidenleichen gepunden sein fvmfzich phvnt phenninge wienner mu^enizze zu^o der chappellen gen Willdungsmawer; in dem ersten jar wanne wier seinen tot erfu^eren, so schulle wier fvmf vnd zwainzich phvnt richten vnd dar nach in dem andern jare fvmf vnd zwainzich phvnt. Vnd loben auch mit vnsern trewen an aydes stat daz wier die vo^ergenanten fv^omfzich phvnt antwu^erten schullen den erbern herren pru^eder Niclasen von Wildungsmawer zu den zeiten maister zu Mewrperg vnd hern Albern von Wildungsmawr seinem vettern daz sie die egenanten phenninge der chappelen schullen anlegen nach ierer frevnt rat. Wer aber daz wier sie der phenninge nicht richten zu^o den taegen als vorgescriben stet, welchen sie danne vnder vns voderen, der sol dar nach in den nachsten acht tagen invaren vnd laisten gen Wienne in ain erber gasthaws da si vns hin zaigen mit einem erbern knecht vnd mit vier pherften, vnd schol laisten vnd inne ligen als laistens vnd inne ligens recht ist in dem lande zu O^esterreich vnd schol nicht auschomen als lange, vntzen daz wier die obgenanten phenninge verrichten. Vnd wer vns mit dem prief manet, dem schulle wier der gelube aller gepunden sein als vo^ergescriben stet als gantze als in. Dazu^o verpint wier vns auch, ob wier daz alles nicht stet hielten als vo^ergescriben stet, so schol in vnser herre der hertzog in dem lande oder wer dez landes gewaltig ist geholffen sein gegen vns, daz sie der egenanten phenninge vnd alles dez schadens den sie der phenninge genomen haben mit reisen mit czerung oder mit welchen sachen daz sei, bechomen mit vnserm gu^etleichen willen an alle chlage vnd an alles recht von allem dem gu^et, daz wir vnd vnser erben haben in dem lande zu^o O^esterreich wier sein lemtige oder to^et. Vnd daz dise red stet vnd vnzerbrochen beleib, darvber so gebe wier disen prief zu^o ainem waren gezewge diser sache versigelten mit vnser paider anhangunden jnsigelen vnd mit vnsers swager jnsigel hern Wilhalms von Pawngarten der diser sache ist gezewge mit seinem insigel. Der prief ist geben nach Christ gepu^ert drewzehen hvndert jare darnach in dem siben vnd fvmfzigisten jare an sand O^eswaltstage.

Source Fulltext: OÖUB 7 (Wien 1876), S. 520f., Nr. 513