Wir Vlreich vnd Hainrich prüder grafen ze Schownberch wechenen offenleich mit disem brief, daz wir vns dez versprochen vnd verpunden haben, daz wir dez ertags der schierstt chumt einen tag nemen vnd schuchen (sic) schullen gen Pazzaw in die stat mit vnserm ernbirdigen hern hern Gotfriden pyschof ze Pazzawe vm all chrieg stötz vnd aufleuff, die wir vnd die vnsern mit im vnd den seinn mit einander ze handeln und ze schaffen haben, wir schullen auch vier erbarig man darvber nemen, der vnserr herr von Pazzaw an seim tail genomen hat die ersam hern Alwern von Svnberch vnd herrn Gorgen von Ahaim, so haben wir an vnserm tail genomen den ersamen hern Linhart von Morspach vnd vnsern trewn lieben hern Alwern von Portzhaim, vnd geben auch den vieren vollen gewalt gantzleich ze sprechen nach iren trewn vnd ayden vm all chrieg stötz vnd aufleuff, di ze dyser zeit zwischen vnsers hern von Pazzawe vnd der seim vnd auch vnser vnd der vnsern sind swie die genant sind, vnd schullen vns auch wesorgen daz wir fu^erbaz an all chrieg stötz vnd aufleuff mit einander weleiben. vnd wär daz die vier mit einander nicht mochten vbereinchomen oder an ichtev stötzig wurden, damit wir vnd vnser vorgenante herrn von Pazzaw liewpleich vnd vreuntleich mit einander veraint vnd verzicht wurden, so haben wir paydenthalwen mit veraintem muet vnd willchem ze einem vberman genomen vnsern lieben ohaim hern Otten von Mezzaw also, daz er mit samt den egenanten vier spruchleuten vber die vorgeschriben chrieg stötz vnd aufleuff sitzen vnd davon nicht chomen schullen, si verainn vns vnd vnsern vorgenanten hern pyschof Gotfriden von Pazzaw gentzleich vnd gar darvmb vnd wesorgen vns auch, daz wir fürbaz vreuntlich vnd liepleich an all chrieg stötz vnd aufleuff mit ein ander lewen. wär awer daz vns auf den obgeschriben tag der spruchleut ainer oder mer abgang daz die dabey nicht gesein mochten, an welhelm (sic) tail daz wär, so schullen wir einen andern oder andere an geuär an dez selwen oder der selwen stat stellen. Vnd darvber ze einem vrchund geben wir dysen brief mit vnsern anhangunden jnsigeln versigelten. Der geben ist ze Schawnberch an sand Margreten tag nach Christz gepurd drutzehen hvndert iar darnach in dem syben vnd fvmtzigsten iar.

Source Fulltext: OÖUB 7 (Wien 1876), S. 513f., Nr. 505