Ich Weikchart und ich Pilgreim wir paid prueder di Polhaimer von Rechperch wir veriehen offenbar an dem prief und tun chund allen den di in ansehent oder horent lesen, daz wir unserm ohaim Gorigen von Volchenstorf versatzt haben umb sehs pfunt pfenning alter wienner munze und fur diselben pfenning haben wir im geben unser aygenschaft an den tzwain gueten di hernach geschriben stent. Daz ain auf der O^ede daz ander in dem Nollenpachen gelegen pei Weizzenperch in Pukchinger pfarr, und di der erber ritter her Marchart der Ponhalm von uns ze lehen gehabt hat mit allen den nutzen und dazu gehört versuecht und unversuecht wie daz genant ist, und schol auch unser genanter ohaim Gorig von Volchenstorf die genanten aygenschaft auf den zwain gueten versetzen und verchaufen und leichen mit der hant und allen sein frum da mit schaffen, wer aber daz getan daz im indert dhain chrieg davon aufstuendt wie sich das fuegt, den schullen wir im ausrichten an allen sein schaden und schol er daz haben, datz unsern treuen und datz aller unser hab di wir haben in dem lant ze Osterreich. Daz im und sein erben daz also stet und unverchert beleib, daruber so geben wir im den offen brief zu einer warn urchund versigelten mit unser paider anhangunden insigeln. Der brief ist geben nach Christi gepurd dreutzehen hundert jar und in dem siben und fumftzikisten jar des montages in den pfingtveyertagen.

Source Fulltext: OÖUB 7 (Wien 1876), S. 509, Nr. 501