Wir Albrecht etc. tun chund, daz wir vnserm getrewn Dietmaren dem Aistershaimer gelten su^ellen vnd schuldig sein ccc. t (pfund) wienner pfenning die er vns zu der losung der vest ze Ror berait gelihen hat, vnd haben wir in darvmb behauset gen Chlavs also, daz er vnd sein erben dieselben vest innhaben sullen mit allem dem so darzu geho^ert an allen abslag, vntz daz wir si der egenanten ccc. t. d. (talenta denariorum) gentzlich verrichten vnd gewern, vnd sullen wir si in der zeit da nicht enthausen. Auch sol der egenant Aistershaimer vnd sein erben oder wer die obgenante vest datz Chlavs von iren wegen innhat, vns vnsern lieben sunen Rudolfen Friderichen Albrechten vnd Leupolten hertzogen vnd vnsern erben da mit wartend vnd gehorsam sein, vns vnd die vnsern darin vnd darauz ze lazzen wenn vns des not beschiecht. mit vrchund ditz briefs etc. Datum Wienne feria secunda ante Lucie anno domini m ccc lvij/mo.

Source Fulltext: OÖUB 7 (Wien 1876), S. 538f., Nr. 528