Wir Albrecht etc. tu^on chund, daz wir vnserm getrewen Jansen dem Travner gelten sullen mcc. t. (1200 pfund) wienner pfenning die er vns berait gelihen hat an der losung ze der Freynstat vnd der vest Chlingberch, vnd haben in darvmb behauset hintz der Freynstat, daz er die stat vnd die purch daselbs vnd die vest Chlingberch mit allen den rechten eren vnd nuczen die darzu^e gehorent innhaben vnd niezzen sol als die von Walsse habent inngehabt. wir sullen ouch demselben Jansen dem Travner vnd seinen erben ein purchhut ierlich geben hintz der Freynstat nach vnser getrewn Niclas des Schekchen vnsers chuchenmaisters vnd Dietrichen des Lerbuhler rat vnd sullen wir si ouch mit der purchhu^et dester baz bedenken, daz derselb Jans der Travner an seinen pfenningen vnd an dem lehen daz er vns getan hat nicht schaden nem. swaz ouch ierlich zins gult oder nutz geuallent vber die purchhut die wir in geben, daz sol dem vorgenanten Travner vnd seinen erben geuallen vnd sullen si daz vns vnd vnsern erben an den vorgeschriben mccc (sic) pfunden abziehen vnd abslahen als lang vntz daz si dersel ben pfenning verricht vnd gewert werdent, vnd swenn daz beschicht so sol dann vns vnd vnsern erben die purch vnd die stat ze Freynstat vnd die vest Chlingberch von dem egenanten Travner vnd von seinen erben ledig sein an all widerred. Ez sullen ouch derselb Travner vnd sein erben oder wer die purch vnd stat ze der Freynstat vnd die vest Chlingberch von irn wegen innhat, vns vnd vnsern erben damit wartend vnd gehorsam sein, vns vnd die vnsern darin vnd dar auz ze lazzen zu allen vnsern notturften. Des geben wir etc. Datum Wienne feria sexta ante Georij l^mo octauo.

Source Fulltext: OÖUB 7 (Wien 1876), S. 572f., Nr. 560