Wir Ruedolff von Gotes genaden herczog ze Ossterreich ze Steir ze Kernden etc. tvn chvnd, daz wir vnssern purigern von Enns di gnad getan haben vnd tun auch, daz si von Wienn vncz die Enns ab vnd auf weder von wein noch von getraid noch von wollenn tuch noch von leineim tuch vnd auch ze Steir von o^ele chain mawt geben schullen, an alein ze Wienn sullen si mawt geben vnd richten nach der brieff sag di si von vnsserm liebem herren vnd vatter selig darvmb habent, vnd sol in di gnad als lang weren vncz daz wir sy widerru^effen, vnd davon gepieten wir alle vnssern mawttern den dieser brieff gezaigt wirt ernstleich vnd wellen, daz sy sew bei derselben gnad weleiben lassen vnd dawider nicht chomen in dhainem weg. mit vrchund des brieffs geben ze Wienn an sand Andres abent dez zweliffpoten anno domini M. CCC. l octauo.

Source Fulltext: OÖUB 7 (Wien 1876), S. 606, Nr. 596