Ich Fridreich von Winchel vnd ich Anna sein housvrow vnd all vnser erben wir vergehen offenleich mit dem vnd tun chunt, daz wir meinen prueder hern Hainreichen von Winchel versatzt haben hintz meim sweher Jansen dem Türsen von Rauchenek vnd hintz meim vetern hern Artlieben von Winchel pey der Tuenaw vmb dreizk pfunt pfenning vnd vmb hundert pfunt pfenning wienner munizz also beschaidenleich, daz wir in von demselben vorgenanten satz pringen schullen an allen schaden, wan er vns mant mit dem prief. Daz die red stet vnczebrochen beleib, darvber geb wir im den prief versigelten mit vnserm anhangundem jnsigel vnd mit meins prueder anhangundem jnsiegel hern Weycharts von Winchel, der der sach gezeug ist mit seinem anhangundem jnsigel. Der prief ist geben nach Christes gepurd dreytzehen hundert jar darnach in dem newn vnd fumftzkisten iar an sand Niclos tag.

Source Fulltext: OÖUB 7 (Wien 1876), S. 675f., Nr. 665