Wir abt Christan ze den zeiten des gotshaus ze Lyligenueld vnd die gemain des conuents daselb wir veriehen offenbar vnd tuen chunt, daz wir verwechselt haben ein wis, haizzet die Chamerwis gelegen auf der Satlarn die vnser vreyz aygen gewesen ist, dem erbern chnecht Hansen dem Graewl von Hohenberch vnd Annen seiner hausvrawen vnd ir paider erben vmb newn schilling phenning gelts gelegen ze Wilhalmspurch von ainem lehen haizzet des Schaetzleinslehen ain halbz phunt gelts auf sand Po^eltentag, daz yetzu dient die Chalichprennerinn, vnd aber von ainem lehen haizzet des Chernslehen fumf schilling gelts, auch auf sand Po^elten tag, der selben fumf schilling dient Leutold der Pransteter fumfczig phenning, Hainreich an dem Parcz fumf vnd zwainzig, der richter ze Wilhalmspurch fumf vnd zwainczig, Ott auz dem Munichhof fumf vnd zwainczig, die Mitter mulnerinn fumf vnd zwainczig, die ir lehen gewesen sint von den erbern herren von Hahenberch vnd habent auch si die vorbenant wis ze lehen genomen von den obgenanten herren fuer die obgeschriben newn schilling gelts also, daz si mit derselben wis allen iren frum schullen schaffen verseczen verchauffen geben wem si wellent. Taet in aber die wis yemant furbaz ze chrieg, was si des schaden nement mit recht, daz schullen si haben auf vns vnd auf vnserr hab die zu vnserm gotshaus geho^ert. vnd daz die wandlung vnd der wechsel also staet beleib, geb wir in den prief versigelten mit vnsern paiden anhangunden jnsigeln vnd mit der erbern herren anhangunden jnsigeln hern Stephans von Hahenberch vnd hern Stephans seins sunes, die der wandlung vnd des wechsels damit gezeug sint. Der prief ist keben dreuzehenhundert iar in dem sechczigstem iar ze o^estern.

Source Fulltext: OÖUB 7 (Wien 1876), S. 687f., Nr. 679