ICH Fridreych der Fewstlinch purger ze Perige und ich Chu^enigunde sein haw^esvrawe wier vergechen, daz wier zu aym ewigen selgraet uns und allen unsern vodern geben haben die pewnt halbew die gelegen ist obe dez marchcz ze Perige, und sto^ezt an den stege und an den grabem, da man von dient vier pheninge jaerchleych an sant Go^erigen tage ze pu^erchrecht dem richter zu den selben czeiten und nicht mer, und haben au^ech die geschaft und geben pey unsern lembetigen tagen halbew, alz vor geschriben stet, und habew (sic) ist si unserz aydem Chunracz dez Noegerlein, also beschaidenleich zu ayem (sic) anvange ayns ewigen liechtez nacht und tage ze prynnen in aynnaer la^embpen vor unser vrawen alter in dem goczhaws ze Perige also, wer die halbev pewnt wil inne haben nach unsrem tode nach der vrewnt rat, der schol alle wege daz jar halbs daz liecht davon berichten und belewchten an allew ierrunge. Die weyl wier leben so well wier is selb inne haben und verrichten. und mer waer, daz chayn saw^emmu^enge daran wu^erde von dem der di vorgeschriben halbeu pewnt inne hat nach unserm tode, so schol sych wer dez goczhaws zechmaister ist ze Perige von der purger wegen, der halben pewnt underwinden an allen chriege und daz halbe jar davon belewchten als emal nu^e geschriben stet, und wer mesnaer ist pey dem selben goczhaws ze Perige, dem schol man jaerchleich ayn meczzen chorn geben daz er des liechcz phlege und dez fleizsigaer sey, und ist der sach geczewge Dietreych der Daw^em Ott der Smide Christan der Windisch Chu^enrat der Noegerl Nycla der Mu^egerl Hainreych der Rayde Chu^enrat der Ringel Nycla der Messrer Fridel in der Freyunge Nycla der Chw^ersner Christan der Tw^enschaden und an der erber lewt genu^ege. Und das die rede staet und ewichleich dapey beleib, wann wier aygens insygel nicht haben nach dez marchcz gewanchait geb wier den brief ze aym ewigen u^erchu^ent versygelt mit Wysencz unserz richter anhangunden insygel ze den selben zeitten ze Perige, und ist der sach geczewg Hainreych der Lemppel mit seim anhangundem insygel. Der brief ist geben nach Christez gepu^erdt drewczechen hundert jar und darnach in dem drew und sechczgkistem jar an sant Gregori tage des heyligen pabcz.

Source Fulltext: OÖUB 8 (Wien 1883), S. 127f., Nr. 122