ICH Ott mayster Chu^enracz su^en von Aurtal purger zw Wels und zw den zeyten lyechtmaister sand Johans der pharr da selbs vergich, daz ich nach rat und gunst dez richter und dez rattz und der pesten purger gemainleich daselbs zw Wels zw chawffen han geben der erbern vrawn vrawn Gedrawten Haynreichs dez O^erholln wilyben salygen weylen purger zw Weh dem got gnad sechs Schilling allter wiener phenning geltz ewigs purchrechtz auz dem lyecht daselbs jer und ieren erben zw raichen und zw geben ich oder swer nach mier lyechtmayster ist alle jar ja^erleichen an sand Margreten tag, um vier und czwaynczk phunt phenning der ich vor genantter lyecht mayster und daz lyecht und dew purger von ier gancz und gar gericht und gewert sein, und hat si daz getan zw aym rechten sellgera^et ier und ierem wiert und ieren chynden und allen yeren vodern und ieren nachcho^emen und wesunderleich zw hylff und zw tro^est allen gelawbigen selln, und schol auch ich vorgenantter lyechtmayster oder swer nach mier lyechtmayster ist dew vor verschryben phenning ier raichen und geben alls vor verschryben ist unczt an ieren to^ed, daz si damit wegen schol den jartag mit aym halben phunt phenniug dacz der pharr mit vigyly und mit sellmezz, und mit sechczk phenniug dacz den pru^edern auch mit vyligii (sic) und mit sellmezz , und nach ierem tod so scholl ichs oder swer nach mier lyechtmayster ist raichen und geben dem pharrer sechczk phenning und dem czwayen geselln vier und czwainczk phenning und dem chaplan vier phenning und dem schu^ellmaister acht phenning und dem mesnoern vier phenning und zwainczk phenning um lyecht und arm la^ewten, und dar um der pharrer oder swer pharrer ist vyglij (sic) hayssen syngen und dez morgens sell¬mezz syngen und ier wehugnuczz wegen alle jar jaerleich an sand Margreten tag als sytleich und gewanleich ist ander jar ta^eg. Und dar¬nach so scholl ich raichen und geben dew uberigeu sechczk phenning hincz den pruedoern auch zw aym jartag darum man syngen schol vigilij und sellmezz zw hilf den selln und allen glawbigen selln. Wa^er awer daz ich vorgenantter lyechtmayster oder swer nach mier lyechtmayster ist den vor verschryben selln und allen gelawbigen selln dew vor verschryben sechs schilling phenning geltz nicht raichten und geben und den jartag da von nicht wegiengen an dem tag als vor verschryben ist, so schol uns und daz lyecht der pharrer oder swer pharrer zw Wels ist, mit der gotse (?) no^eten und wetwingen darzwe als lang, unczt daz wier den vor verschriben jartag gancz und gar vollenten und volfu^eren als vor an dem prief verschriben ist. Und schol auch ich vorgenantter lyechtmayster und daz lyecht oder swer nach mir lyechtmayster ist und dew purger mit sampt uns der vorverschryben sechs schilling phenning geltz ier gewer sein und schollen sew daz haben dacz dem lyecht und dacz dem lyechtmayster und dacz unsern trewn und auf alle dew und daz lyecht hat, und schol auch den prief nyempt inne haben nach ierem to^ed den swem in der richtter und der ratt enphilicht von ieren trewn. Und enphilich ich auch daz gescha^eft und daz sell gera^et dem richtter und dem ratt und den purgern hincz ieren trewn ewichlich. Daruber zwaym waren urchund der worhayt geben bier in den prief, der wesigellt und westaetygt ist mit meynem vorgenanten Ottens dez maister Chu^enratz sun zw den zeiten lyechtmaister sand Johans der pharr zw Wels anhangunden insigell und zw aynner pessarn sicherhait mit dez erbern mans Dyetreichs dez jungen Hawnoltz zw den zeiten gebaltygen statrichtter zw Wels und mit der erbern statt zw Wels anhangundem insigell daz sew uns habent angelegt zw ainer geczewgnuzz der vor verschriben sach. Der prief ist geben an unser vrawntag in der vasten nach Chrysti gepu^erd uber drewczehen hundert jar darnach in dem drewsechczkisten jar.

Source Fulltext: OÖUB 8 (Wien 1883), S. 129ff., Nr. 125