Wu^er Rudofff der vierd von Gotes gnaden erczherzog ze O^esterreich ze Steyr unnd ze Kernden herr ze Crain auf der Marich und ze Portenau graf ze Habspurch ze Tyrol ze Phirt und ze Kyburg marichgraf ze Purgau und lantgraf in Elsazz thun chunt offenlich mit disem brief fu^er uns die hochgebohrnen fu^ersten Albrecht und Leopolten unser lieben prueder und unser erben und nachkomen, alss uns die edelen unser lieb ohem graf Wernhard graf Ulreich und graf Hainreich von Schovenberch die herschafft Ort bey der Tu^enau das ist die vest und marckht daselbs dorffer ho^efe huben und swaig leut und gueter unnd allez daz daz darzue geho^ert dass si alles von dem gotshawss ze Regenspurch habent zelehen gehabt, geben und gemacht habent und alss wu^er das nach sag unserer handtvest und briefe die wu^er von alten keysern und ro^emischen künigen haben wol mu^egen aufgenemen also hat uns unsern vorgenanten bruedern erben und nachkomen der erwu^erdig herr pischof Fridreich von Regenspurch unser lieber ohem die egenanten lehen alle di zerecht und vor alter von seinem gotshawss daruerent verlichen und perinvestiert also wu^er dess sein lehenbrief haben. davon sullen wir unser brueder erben und nachkhomen an dem herczogtum ze O^esterreich die fu^erbazzer ewichleich emphachen und erkhennen von dem gotshaws ze Regenspurch in aller weis alss wir ander unser lehen von in erchennen. Und dez ze einem waren und offenem urchundt diser sache geben wir disen brief bisigelt mit unserm grozzen fu^erstlichen anhangunden insigel, der geben ze Wienn am freytag vor dem pfingstag nach Christes gebuerd dreyzehenhundert jar darnach in dem drey und sechzigisten jar unsers alters in dem vier und zwainzigisten und unsers gewalts in dem fu^enfften jare.

Source Fulltext: OÖUB 8 (Wien 1883), S. 134f., Nr. 129