Wir Ru^odofff von Gotes gnaden herczog ze O^esterreich ze Steyr und ze Kernden etc. tu^en chunt, daz wir angesehen haben die lawtter trewe und manigvaltig dienste die unser getrewer lieber Eberhart von Walsee von Lyncz unsern vorvordern uns und unsern pru^edern getan hat und furbaz tu^en sol und mag, und haben im empholhen unser houptmanschaft ob der Ens und emphelhen ouch mit disem brief mit vesten stetten gerichten a^emptern mautten zo^ellen mu^enzzen zinsen zehenden stewren ungelten vogteyn und mit allen andern nuczen rechten und zugehorung wie die genant sind, ane alain die mautten ze Lyncz und ze Gmunden dicz gegenwurtigen drey und sechczigisten jars die wir selber hingelazzen haben, aber nach disem jare sol er dieselben zwo mawtten ouch beseczen und inne haben mit sampt andern emptern der egenanten houptmanschaft, also daz er die mit den vorgenanten zu^egeho^erungen innehaben beseczen hinlazzen und versorgen sol uncz an unser unser pru^eder oder erben widerru^effen nach seinen triwen als in dunchet daz uns und unsern pru^edern das aller nuczest sey ane alle geverde. Wie er ouch die empter der egenanten houptmanschaft beseczet und versorget nach seinen triwen, das ist unser gu^eter wille und wellen ez stet haben ane widerred. Darumb gebieten wir ernstlich allen unsern lantherren rittern und knechten mawttern zollern munzzern richtern und andern amptlewten reten purgern und allen andern unsern undertanen die in die vorgenant houptmanschaft geho^erent wie die genant sind, daz si dem vorgenanten von Walsse unserm houptman in den vorgeschribenen sachen gehorsam und geholffen sein wenne er si vordert uncz an unser, unser pru^eder oder erben widerru^effen. Mit urchund dicz briefs, geben ze Judenburch an mitichen nach sand Erharts tag nach Christs gepu^erd drewczehen hundert jar darnach in dem drew und sechczigistem jar.||
+ Hoc est verum. +

Source Fulltext: OÖUB 8 (Wien 1883), S. 122, Nr. 116