Wir Rudolff von Gots gnaden hertzog ze Osterreich ze Steyr und ze Kernden graf ze Tyrol etc. embieten unserm liben getrewn Jansen von Trawn phleger ze der Freinstat unser gnad und allz gut. Wand wir maynen und wellen daz unser pawe daselbs ze der Freinstat furganch hab, davon gebieten wir dir gar ernstlich und wellen, daz du zu demselben pawe ze stewr ze disem mal auflegest unverzogenlich uf ainen iglichen hof hofstat huben und lehen gelegen in dem lantgericht das da gehört zu der Freinstat, si gehoren an herrn ritter oder kriecht ebt probst oder ebtessinn oder wie die genant sind, auf den hof sechtzig phenning uf die hofstat zehen phening uf die huben virtzig phenning und uf das lehen zwen und dreizzig phenning, und diselben phenning an das egenant pawe legest nach seinen notdurften alz wir dir des getrawn, daran begest du gentzlich unsern willen. Wer aber daz ymant in dem egenanten lantgericht des wider wer daz du den darzu nottest von unsern wegen. Geben ze Wienn an mantag nach gots leichnams tag anno domini millesimo trecentesimo sexagesimo tercio.||
Dominus dux per se.

Source Fulltext: OÖUB 8 (Wien 1883), S. 144f., Nr. 136