Wier Rnedolff der vierd von Gotes gnaden erczherczog ze O^esterreich ze Steyr und ze Kernden herr ze Krain auf der Marich und ze Porttnawe graf ze Habspurg ze Tyrol ze Phirt und ze Kyburg marichgraf ze Purgowe und lantgraf in Elsazz bechennen mit disem brief fur uns und unser brueder erbm und nachkomen umb die invart mit dem Gmundischen salcz in die Ens, darumb unser purger von Gmunden und ouch von Ens sto^ezzig gewesen sind, daz wir dieselben invart genczlich abgenomen haben und nemen si ouch ab mit disem brief. Und wan unsern purgern von Ens davon irs gewerbes und ierr arbait vil abget, haben wier denselben purigern von Ens dafur zu ergeczung und zu ainer widerlegung der egenanten invart die gnad getan und tu^en ouch, daz si frey und ledig varen sullen mit iern weynen auf dem wazzer auf und ab zwischen Ens und Wienn vor allen mautten, an zu Wienn da si die mautt richten sullen, und ze Ybs sullen si ier gewonlich recht geben, und zu Emmerstorf sullen si ouch mautt geben als ander unser leut und purger. Und sullen ouch die egenanten purger von Ens dieselben ier weyn bestetten mit ier ayde, daz die ier sein und nicht andrer leut so beschaidenlich, swas dieselben purger von Ens des Gmundischen salczes fu^erent, daz si damit varen an den stetten als ez von alter gewonhait herchomen ist. Welicher aber under in des nicht tet und ubervaren wu^erde, der sol das salcz genczlich verlorn haben an alle gnad und sullen ouch wier denselben darczu^e pezzern nach unsern gnaden. Und des zu urchund geben wier in disen brief besigelten mit unserm grozzen fu^erstleichen anhangunden insigel, der geben ist ze Wienn an eritag in den phingst veyrtagen nach Kristes gepu^erd drewczehen hundert jar darnach in dem drew und sechczigisten jar unsers alters in dem vier und zwainczigsten und unsers gewaltes in dem fumften jare.||
+ Wir der vorgenant herzog Ruodolf sterken disen prief mit dirr underschrift unser selbs hant. +

Source Fulltext: OÖUB 8 (Wien 1883), S. 135f., Nr. 130