ICH Lewpolt von Weizzenberch und alle mein erben vergehen, daz wir unserm frewnt Ru^egern von Starichenberch und seinen erben ze chauffen geben haben zehen phunt wienner phenning geltes auf manschaft die wir haben gelegen in dem lande O^esterreich ob der Ens, in welichem gericht die gelegen sein die purger oder pawrn von uns ze leben habent, ez sey auf zehenten oder auf andern gutern wie die genant sind, und auf alle die und darzu^e geho^erent ze velde und ze dorf es sey gestift oder ungestift versuecht oder unversuecht daraus si die wal nemen sullen wo in daz allerpest fu^egt und gevellet an allen ierresal so verre, daz si zehen phunt wienner phenning geltes gantz und gar darauf verricht und gewert sein, und sullen auch wir in den selben chauf richtig machen und bestaeten mit aller bestaetnuzze die daruber geho^eret nach des landes recht ze O^esterreich ob der Ens zwischen hinne und sand Michels tag der nu schierist chumpt. Tu^en wir des nicht, swenne si uns denne manent und vaderent so sullen wir in denne einen erbern chnecht mit einem phaert des naechsten tages darnach hintz Wienn in ein erber gasthaws senden da uns der vorgenant her Ru^eger von Starichenberch oder sein erben hin zaigent, und sol der da inne liegen und laysten, als inne likens und laystens recht ist, und da nimmer auscho^emen in werde ee der vorgenant chauf richtig gemacht und bestaet und alles daz gaentzleichen volfu^ert, als vor an dem brief geschriben stet. Daz luben wir in alles an alle widerrede ze laisten mit unsern trewn. Und daruber so geben wir in den brief zu^e einem warn richtigen u^erchunde diser sache versigilten mit mein vorgenanten Lewpoltz insigil von Weizzenberch und mit unser frewnt insigiln hern Weicharts des Toppler und Ulreichs des Liechtenekker, die diser sache gezeugen sind mit iern insigiln. Der brief ist geben ze Wienne nach Christes gepurde dreutzehen hundert jar darnach in dem vyer und sechtzigisten jar des naechsten mittichens vor sand Lutzein tage.

Source Fulltext: OÖUB 8 (Wien 1883), S. 200, Nr. 197