Ich Leb die zeit chapelan sand Johans altar auf dem charner zu Hedrestorf vergich offenbar an dem prief allen la^ewten, daz ich durch selichait willen gegeben und gemacht han ledichleich mit perchherren hant hern Chunrats di zeit pharrer ze Valchenberch mein jeuch weingarten gelegen an dem Stenglein, da von man ym dient acht phenning an sand Michels tag ze pu^erchrecht der mein rechtz erib ist und darauf ich geweycht pin zu der ebigen mess dew gestift ist auf dem egenanten charner ze Hedrestorf zu einem selgeraet aller der la^ewt die da fu^edrer und helffer sind der egenanten mess, und auch auf dew red daz ebichleich ein yegleich chapelan nach meim tod dester pezzer tragnu^ess gehaben mag, und ich vorgenanter Leb pin sand Johans rechter scherm und gvver des egenanten weingarten fu^er all ansprach als pu^erchrechtz recht ist in dem land ze Osterreich. und des ze urchund gib ich sand Johans und seinen verbesern den offen prief versigelt mit des vorgenanten percherren insigel hern Chunrats pharrer ze Valchenberch und mit hern Haiureichs insigel di zeit pharrer ze Hedrestorf und mit des erbern mans insigel Otten des Geveller purger ze Hedrestorf wann ich selber di zeit aygens insigels nicht gehabt han. Der prief ist geben nach Christs gepu^erd drewzehen hundert jar darnach in dem fu^emf und sechczkisten jar an sand Peters tag yn der vasten.

Source Fulltext: OÖUB 8 (Wien 1883), S. 209, Nr. 205