Ich Hertel der Ka^etringer und all mein erben verjehen, daz ich ze chauffen han geben dem erbern herren hern Hertneiten von Losenstain und allen sein erben mein hueb in dem Dra^etenpach die vreiz aygen ist und ist gelegen in Wolfharrer pharr, mit allen den nutzen und rechten di darzue geho^erent umb an ainz zwaintzich phunt phening alter wienner munzz der er mich gantz und gar gericht und gewert hat mit peraiten phening, und schol ich im obgenanter Katringer di hueb frein und schierm fu^er allen chrieg und ansprach also des landes recht ist. Daz di red also stet und unzeprochen beleib, daruber gib ich obgenanter Hertel der Ka^etringer den prief versigelt mit meim anhangunden insigel, und zu ainer pezzern sicherait der warhait mit meins prueder Philippen des Katringer insigel. Daz ist geschechen do man zalt von Christi gepurd dreutzechen hundert jar darnach in dem fumf und sechtzkisten jar des sampztags var sant Thomas tag.

Source Fulltext: OÖUB 8 (Wien 1883), S. 257, Nr. 258