Wir Alber und Leupolt gebru^eder von Gotes gnaden herczogen ze O^esterreich ze Steyr ze Kernden und ze Krain grafen ze Tyrol etc. tu^on chunt umb die tayding und den chauf alz hie vor seliger gedechtnusse unser lieber bru^eder herczog Ru^odoff von O^esterreich dem Got genad angevangen und gedacht hatte ze tu^en mit unsern lieben getrewen Hainreichen von Walsse von Drosendorf und seinen sunen umb alle die lehen manschaft und verlehente gu^eter wo die gelegen und wie sie genant sein, die denselben von Walsse von Drosendorf hievor geschaffet gegeben und recht und redlich gemachet sind von iren vettern seligen hievor den herren von Walsse ob der Steyrmarich, als dieselben von Walsse die egenanten manschaft und verlehente gu^eter mit chauffen von erbschaft oder dhainer andrer zu^ovallung wegen an sich geczogen hatten, hievor von den herren von Wyldoni von den Schenchen von Rabenstain und von den Trabergeren oder wie si dieselben lehen ancho^emen waren, darumb der vorgenant unser bru^eder selig herczog Ru^odolf und die egenanten von Walsse von Drosendorf ze schidung hinder genante spruchleute gegangen waren, daz wir durch besunder gnad und liebe die wir haben zu denselben von Walsse von Drosendorf und ouch durch der dinst willen die si und ir vordern uns und unsern vordern vormals offt willichlich und getrewlich getan habent und die si und ir erben uns und unsern erben noch fu^erbas wol getu^en mugen und sullen, gelazzen haben gar und genczlich und lazzen mit disem briefe wizzentlich fu^er uns und unser erben von den egenanten taidingen und dem chauff als vor beschaiden ist, und haben gegonnen und gonnen auch den egenanten von Walsse von Drosendorf und iren erben, daz si die vorgenanten lehen manschaft und verlehente gu^eter zu^e den si doch go^etlich recht habent als wir des wol underweiset sein innehaben und niezzen verleihen und besiczen sullen und von iren mannen dinsts und der verlehenten gu^eter anvelle da von gewarten sullen als landes und lehens recht ist und als ir seligen vettern die von Walsse ob der Steyrmarich die an si bracht habent an alles geverde. Waz derselben manschaft und verlehenter gu^eter von uns ru^erent und lehen sind die die vorgenanten von Walsse ob der Steyrmarich den Got genad fu^erbazzer in nachlehens weise andern leuten ze leihen hatten, die sullen die egenanten von Walsse von Drosendorf und ir erben ewichlich von uns und unsern erben ze lehen emphahen, und haben und sullen ouch wir in die leihen geleich andern vesten und gu^etern di si oder ander unser man von uns ze lehen habent als landes und lehens recht ist an alles gever. und daruber ze urchund geben wir disen brief besigelten mit unsern irisigeln, der geben ist ze Wienn an phincztag vor sand Antonytag nach Kristes gepu^erd dreuczehen hundert jar darnach in dem sechs und sechczigistem jare.

Source Fulltext: OÖUB 8 (Wien 1883), S. 259f., Nr. 260