Ich Stephan der Lichtenwinchler und mein hausvrawe ver Margret und unser paider erben wier verjechen, daz wier versaczt haben unser wis in der Sweyber gelegen in Everdinger pfar Ulreich dem Smid von Towel und seiner hausfrowen und ier paider erben umb sex phunt phenning alter wienner mu^ens der wier von in gancz und gar gericht und gewert sein. Waer awer daz iem cho^em und wolt pesser erb sein czu der vorgenantn wis und wolt di lo^esen, der schol von in lo^esen umb di obgenantn sex phunt phenning und schol in des nindert ierren. Daz in di red staet und unverchert peleib, dorumb geb wier in ich vorgenanter Stephan und all mein erben den prieff versiglt mit meinem anhangunden insigel, und cze einer waren czeugnusse mit des erbaern man Wernher dez Pörczhaimer insigel und auch mit Renwarcz des Salhatobler cze den czeiten pu^ergraff cze Tachsperg insigel und mit Chunrat des Awer insigel. Und verpinten uns dorunder ich und all mein erben mit unsern trewn alles daz staet und war cze halten daz vor geschriben stet. Der prieff ist geben do man czalt nach Christi gepurd dreuczehen hundert jar darnach in dem sex und sechgistem jar des suntages cze mitvasten do man singt Letare.

Source Fulltext: OÖUB 8 (Wien 1883), S. 271f., Nr. 274