Wir Ulreich und Hainreich pru^eeder grafen von Schawnberg bechennen und tu^en kunt mit dem brief umb die lehen so unser lieber vater seliger graf Hainreich von Schawnberg und unserr lieb vettern graf Wernhart graf Ruedolf graf Fridreich selig grafen von Schawnberg dez obgenanten unsers vater pru^eeder verlihen habent hern Chunrat von Tannberg und sein erben auf unserr maut ze Aschach also, waz si weines oder getraides in ir haus bedurfund sind, daz si daz vrey und ungemaut an derselben unsrer maut ze Aschach fu^er fueren sullen und mu^egen; und ob derselb herr Chunrat von Tannperg und sein erben abgiengen, so solten die lehen erben und gevallen auf Ulreichen von Tanberch und auf sein erben alz der brief lautet den si von unserm obgenanten vater und vettern seligen darüber habend. die selben lehen haben wir verlihen Gundachern von Tannberch Ulreichs von Tannberch su^en den si mit dem todde angefallen sind, und bestaeten auch im und sein erben die obgenanten lehen mit sampt dem brief den si von unserm obgenanten vater und vettern seligen darüber habend. Mit urkund dez briefs den wir in darüber geben versigelten mit unsern insigelen und geben ze Schawnberch am pfintztag nach dem ostertag do man zalt nach Christi gepurt drewzehen hundert jar und darnach in dem sehs und sehzigistem jare.

Source Fulltext: OÖUB 8 (Wien 1883), S. 272, Nr. 275