Ich Ulreich der Mayer ze sand Florian mein hausfraw und all unser erben verjehen, daz wir die halben hueb dacz Hekking mit allen ern rechten und nutzzen haben geben ze leibgeding Engelscholichs chinder von Danering Hansen und Agnesen nur zu ir zwain leiben auz unser nucz und gwer in die irn als wir die selb inn haben gehabt, umb sechzigh und sechs phunt wienner phenning der si uns gancz gewert haben an unsern schoden also mit der beschaiden, daz si uns allew jar davon schullen geben und raichen in unsern hof ze sand Florian sechs hofmut habern mit der mazz also man seu meinen herren den Chorherren ze Pazzaw auf irn chasten dienen schol, und einen wyder oder sechs und dreizzig wienner phenning zwen cha^es ze weynachten zwen ze ostern sechzich ayer und drey schilling wienner phenning an allen abganch, swelherlay presten in dem lant wer wir wollen sew dann von unsern aygen willen daran in dem presten bedenchen, und wann die obgenanten zwen leib nimer sint so ist uns die obgenant halb hueb ze Hekking ledich werden an allen chrieg. Daruber geben wir in den brief ze urchund versigelt under des erwern mannes insigel Hainrich des Celler aus der Rudaw (Ridaw?). Daninder verpint ich mich obgenanter Ulrich der Mayer ze sand Florian mein hausfraw und all unser (erben?) mit unsern trewn allez daz sta^et ze haben und ze volfu^ern daz an dem brief ist verschriben, der geben ist an dem liechtmissabent nach Christes gepurt dreuzehenhundert jar und in dem sechs und sechczgisten jar.

Source Fulltext: OÖUB 8 (Wien 1883), S. 262f., Nr. 263