Ich prueder Uolreich abt ze Gotstal und der covent daselbz verjehen, das uns her Eberhart von Walse seliger hern Fridreichz und hern Heinreichz von Waise von Drosendorf vater geschaft hat dre hundert pfunt wienner phfenning, der wir gericht und gewert sein gantz und gar auf dem dorff ze Ottental also, daz wir daz vorgenant dorf su^ellen inn haben mit allen nu^etzen in satzzez weis fu^er die vor genanten dre hundert pfunt also, daz wir den vorgenanten hern Eberharten von Walse und seiner hausfraun und allen sein chinden und allen sein vodern seien alle jar an seinem jartag einen jartag su^ellen hegen also, daz man vigilig sol singen am abent und jeder herr sol selb ein mezz sprechen dez morgentz und ein ampt sol man singen dez selben tagz auf dem vorgenanten alter; man sol auch dezselben tagez jedem herren und jedem prueder in dem vorgenanten closter zwae mal weizz prot geben und jetschleichem herren und prueder ein stuch fisch und einen phfeffer daran. Man sol auch auf dem vorgenanten alter alle tag ein mezz haben ewichleichen und ein ewigz lieht davor daz tag und nacht prinn on underlaz. und daz in daz allez stet und unzebrochen beleib dar u^eber gib ich vorgenanter prueder Uolreich abt ze Gotstal und der covent daselbz in disen prief versigelt mit u^ensern anhangunden insigelen. Der prief ist geben an unser vrawen tag ze der liechtmiss nach Christez gepurt dreutzehen hundert jar darnach in dem sechz und sechtzigistcn jar.

Source Fulltext: OÖUB 8 (Wien 1883), S. 264, Nr. 265