Wir Albrecht von Gotes gnaden herczog ze O^esterreich ze Steir ze Kernden und ze Krain graf ze Tyrol etc. bekennen, daz wir angesehen haben die getrewn und nuczen dienst die uns unser lieber getrewr Reinprecht von Walsse unser hofmaister und hauptman ob der Ens enther getan hat und hinfur auch wol getu^on mag und sol, und haben im dadurch in phleg weis ingeben und geben auch wissentleich mit dem brieve unser vest ze Starhemberg am Hausrukk gelegen in so^elicher masse, daz er dieselb vest mit allen nuczen eren wirden und rechten und aller zu^egeho^erung als von alter her darczu^e gehoret hat und als er die uncz her hat innegehabt nu furbazzer in phlegweise innhaben nuczen und niessen sol und mag unser lebta^eg. wenn aber Got uber uns gepeutt daz wir nicht mer sein, so sol der egenant von Walsse mit der vorgenanten vest und aller zu^egehorung als vor benannt ist gewertig und gehorsam sein der hochgebornen fu^erstinn frawn Johannen unsrer lieben gemaheln und herczogiun nach lautt der brief die si von uns daruber hat. Und des zu urchund geben wir den brief versigelten mit unserm angehangen insigel. Der gehen ist ze Wienn an sand Augustins tag nach Kristi gepu^erd drewczehen hundert jar darnach in dem sechs und sechczigisten jaren.

Source Fulltext: OÖUB 8 (Wien 1883), S. 288f., Nr. 292