ICH Chunczil der Reysinger ich Dorothea sein hausfraw und all unser erben verjehen, daz wier verchauft haben unsern halben hof dacz dem Graben, der do gelegen ist pey dem Karlsperg in sand Gallnneunchirchen pharr in der Riedmarch und unser freis aygen ist gewesen, dem edlen unserm liben genedigen hern hern Ru^egern von Starchenberch und allen seinen erben umb ein gelt, dez wir von in gancz und gar gericht und gewert sein an allen unsern schaden. Daz in daz sta^et und unverchert bleib, dez geben wier in den prief versigelten mit mein obgenanten Chunczil dez Reisinger anhangunden insigel, und mit der erbern hern Albern dez Stadler und Chunrats von Wezzenberch und meins lieben vetern Dyetreichs dez Reysinger anhangunden insigel. Darunder sich mein hausfraw Dorothea verpint mit iren trewn alles daz staet ze haben daz oben an dem prif geschriben stet, der do geben ist do man zalt von Christi gepu^erd dreuzehen hundert jar darnach in dem sechs und sechzigesten jar an dem vreitag in der chotempier ze phingsten.

Source Fulltext: OÖUB 8 (Wien 1883), S. 281f., Nr. 285