Ich U^elrich Ottachkerz su^en von Lo^ech und sampt mir all mein eriben und ich Elspet sein swester und all mein eriben und ich Seydell Awboldinger ier man und mitsampt u^ens all u^enser eriben wier verjechen, daz wier ze chauffen geben haben unserm lieben styffvatter Hainrichen dem Ro^eselho^effer seiner hawsfrawen und allen iren paiden eriben unser swayg gelegen in dem Enstal dew gehaizzen ist am Hu^enczpu^echel und ist gelegen in Grebnechker pharr, und dew selbeu swayg ist unser rehtz lehen gewesen von unserm lieben genedigen herren dem hertzogen von O^esterreich, und unsern hoff ze Loch der da gelegen ist in Chirichdorffer pharr, und der selb hoff ist unser rechtz lechen gewesen von unserm lieben genedigen herren herrn Ewerharten von Waltse, und haben inz geben umb ein gelt dez wier gar und gantz gericht und gewert sein. Wier schulten auch der swayg und dez hoffs ir gewer sein als chawfs rehtz ist in dem land ob der Ens. Daz in daz allez stet und unverchert beleib, daruber gib ich vorbenanter U^elrich in den offen brief versygelten mit meinem anhangenden insygel. so geben wier ich vorbenantew Elspet und ich Seydell Awboldinger ier man in den offen brief versygelten mit unsers lieben vetern anhangenden insygel Go^etfritz dez Awboldingers ze den zeiten vogt ze Wels, darunder wir uns verpinten mit unsern trewen an aydes stat allez daz staet ze haben und ze volfu^eren daz vor an dem brief geschriben stet, und zu einer pezzer sicherhait der worhait mit der erbern la^ewt anhangenden insygel versygelten U^elrichs dez Hawsloden und mit Hermons dez Prawnspergers ze den zeiten lantrtchter ze Slyrwach und mit Stephans dez Tewffenpechken. Und daz ist geschehen do man zalt von Christi gepurt drewtzehenhundert jar darnach in dem sechs und sechtzikosten jar dez nechsten eritags vor sand Thomans tach dez heyligen zweliffpoten.

Source Fulltext: OÖUB 8 (Wien 1883), S. 302, Nr. 307