ICH Peter der alt Herisingcr purger ze Ens vergich offenbar mit dem brief, daz ich recht und redleich ze chauffen han geben mit meiner erben gutleichen willen der ersam vrawen vrawen Annen hern Jansen witiben von Chünrring, dem Got genad, und allen iren erben meinen zehent auf fumf lehen gelegen in dem Enstorff in Valteiner pfarr, der drew Muschartz dez Juden sint di er von Winchern gechaufft hat, und ains daz Hainreich Altman inne hat und ains daz der Hierzz inne hat, den ich ze lehen han gehabt von dem erwirding goczhaus ze Pazzaw, umb tzway und tzwaintzich pfunt wienner pfenning der ich von ir gantz und gar gericht und gewert pin, und sol auch ir den zehent vor dem herren auf geben, wann si mich vodert. wer aber daz, daz ir chain chrieg oder irrsal auf stundt von dez zehentz wegen mit recht von mir oder von meiner erben wegen, den sol ich ir aus richten. Und dez zu einem sichtigen waren urchund gib ich obgenanter Peter Herisinger ir den offen brief versigelten mit meinem anhangunden insigel wolbestettigt, und durch pesser sicherhait willen mit meins lieben ohaim Ulreichs dez Fumfchiricher zder zeit dez rates ainer ze Ens anhangunden insigel. Geben do man zalt von Christi geburd dreutzehenhundert jar und in dem syben und sechtziksten jar dez sunntags in der andern vastwochen.

Source Fulltext: OÖUB 8 (Wien 1883), S. 314, Nr. 321