ICH Christan von Ro^er und all mein erben vergehen, daz wir verchauft und gegeben haben meinem o^ehaim hern Rudolfen von Losenstain siben schilling und acht wienner phenning geltes di unser ledigs rechtes vreys aigen gewesen sind, der gelegen sind datz Oberndorf bey Retelperg, auf Philipps des Pinter lehen sechs schilling und sechs phenning, und ze Weydarn auf Stephans hofstat zwen und dreizzich phenning, die er von uns gechauft hat zu ainem ewigen liecht in unser vrawen chappellen ze Hewn umb achtzehen phund wienner phenning der wier gar und gentzleich verricht und gewert sein so beschaidenlich, daz er und dieselben chappelle di egenanten gu^elt und gu^eter mit alle die so darzue geho^ert als wier di untz auf den heutigen tag herpracht haben fu^erwas ledichlich und vreylich haben sullen, und sullen allen iern frumen damit schaffen wie in das wol cho^em und fu^eg an allen chrieg und ierrsal. Und sein der ier recht gewer und scherm fu^er alle ansprach als aigens recht ist und des landes recht in O^esterreich. Get in fu^erwas daran icht ab mit recht, das sullen si haben auf uns und auf allem unserm gu^et das wier haben in dem lande ze O^esterreich wier sein lebentig oder to^ed. Des ze urchund geb wier den brief versiglt mit mein obgenanten Christans insigel von Ror, mit meins vettern insigel Go^etfritz von Ror und mit meins ohaims insigel Jansen von Wildekk. Geben ze Hagnawe nach Christes gepu^erde dreutzehen hundert jar darnach in dem siben und sechtzgistem jar an sand Agnesen tag.

Source Fulltext: OÖUB 8 (Wien 1883), S. 306, Nr. 311