WIER Albrecht und Leupolt bru^eder von Gotes gnaden herczogen ze O^esterveich ze Steyr ze Ka^ernden und ze Krain grafen ze Tyrol etc. bechennen und tu^en ku^ent offenlich mit disem brief, daz fu^er uns kom unser getrewr lieber Ru^edger von Starchemberg und zaigt uns ain hantvest geschriben in latein die sa^eliger geda^echtnu^ess herczog Fridreich von O^esterreich und von Steyr und herr ze Krain seinem vorvordern Gundakern von Starchemberg gegeben hat, und bat uns vleizzicleich, daz wier im dieselben hantfest von der latein zu ta^eutsch bringen hiessen und in ta^eutscher sprach besta^etten geruchten. derselb brief von wort ze wort in teutsch lautet als hienach geschriben steet: Wir Fridreich von Gotes gnad herczog ze O^esterreich und ze Steyr und herr ze Krain kunden ma^enklichem in kunftige zeit daz unser etc. (wie Urkunde ddo. 27. October 1241, U. B. Bd. III, pag. 1051. Nu^e haben wir die egenanten herczog Albrecht und herczog Leupolt gu^enstikleich angesehen und betrachtet die lautter trew und begier die der egenant Ru^edger der Starchemberger und sein vorvordern zu unsern vorvordern und zu uns stets gehebt, und die manigvaltigen dienst die sy getan habent und die er uns noch tun sol und mag, und haben durch seiner vleizziger pet willen den vorgeschriben brief mit allen den punten und artikeln die darinn begriffen sind vernewet und besta^ett, vernewen und besta^etten auch mit disem brief. Darumb gebieten wier allen unsern mauttern zollna^ern richtern und andern unsern amptla^euten und undertanen wie die genant sind gegenwurttigen und kunftigen, daz sy in bei der vorgenanten gnad und freyung und bey diser unserr besta^ettung an alle ierrung und hindernusse beleiben lassen. Und daruber zu urkunt und sicherheit hiessen wier unsere insigel henkchen an disen brief, der gegeben ist ze Wienn an eritag vor sant Jo^ergen tag nach Kristes gepurd drewczehen hundert jar darnach in dem siben und sechczigistem jar.

Source Fulltext: OÖUB 8 (Wien 1883), S. 316f., Nr. 323