ICH Ulreich der Do^ezz von Vraundorf und ich Ulreich der Do^ezz sein sun und all unser eriben wier vergehen offenleich an dem prief allen la^ewten gegenburtigen und chu^efftigen umb die fu^emfthalb phunt und fu^emf und dreyzzk phenning geltz wieuner mu^enz, die da ligent auf fu^emf halben lehen ze Pernhartzdorf an der Pulka und die ze lehen sind von dem edlen hochwürdigen herren graf Ulreichen von Schaunberch und dew die erber vraw ver Elspet Niclass des Löher witib von Vraundorf dem Gott genad recht und redleich umb ier aygenhafftz guet gechaufft hat, daz wier dew selben gult an ierr stat mit ierm guetleichem willen und nach ierm pet ze lehen auf enphangen haben von dem egenannten hochwierdigen herren graf Ulreichen von Schaunberch und ir trager sein der lehenschaft mit trewes hanten an alz gevaer also, daz wier uns verpinten mit unsern trewn hincz der egenannten vrawn ver Elspeten, wann daz ist daz si iern frum mit dem vorgenanten phenning gult schaffen wil mit verseczzen oder mit verchauffen oder von ier geben wil geistleichen und weltleichen la^ewten wie ierm willen allerpest fuegt und zimt, daz wier sey oder swem si dew egenannten fu^emfthalb phunt und fu^emf und dreyzzk phenning geltz geit oder macht, nindert dar an yerren schullen noch mugen weder mit warten noch mit werichen. Waer aver daz wier der vorgenanten vrawn Elspeten oder swem si die vorgenanten gult macht oder geit daran icht chriegs oder yerrung taeten oder daz wier sew daran yndert hinderten als vor an dem prief geschriben stet, waz sew des schaden nemen den sew ungesworn pei iern trewn gesprechen mo^egen, den schullen wier in widerlegen und abtragen gancz und gar an all widerred, und daz schu^ellen sew haben auf uns unverschaidenleich und auf all unserm guet daz wier haben in dem lant ze O^esterreich, da von sew unser herre der hertzog in O^esterreich oder wer den gewalt an seiner stat hat an allez fu^erbot und an alle chlag phant antwurten schol und uns auch dar zu no^etten scholl als verr uncz daz allez daz volfuert werd genczleich und gar daz an dem prief geschriben stet wier sein lemtig oder tode. und daruber zu einer sicherhait und zu ein warn urchund geb wier der obgenanten vrawn Elspeten den prief versigelt mit unser paider anhangunden insigeln. Gegeben nach Christi gepu^erd uber drewzehen hundert jar darnach in dem siben und sechczkisten jar an dem prehentag.

Source Fulltext: OÖUB 8 (Wien 1883), S. 304f., Nr. 309