Ich Anna hern Chunrats tochter von Eberstorff dem Gott genade und hern Dietmars hausvrow des Rorer vergich für mich und für all mein erben, daz ich mit gutem willen und mit wolbedachtem mut unbetwungenleich mit willen gunst und nach rat des vorgenanten meins wirtes Dietmars des Rorer und ander meiner nächsten freunde zu der zeit do ich es mit recht wol getün mochte mich gancz und gar verzigen und fürczicht getan han und verzeich auch mich und mein erben genczleich mit dem brief gegen meinen prüdern Ulreichen und Rudolfen von Eberstorff und gegen irn chinden sunn und töchter di in Gott nach gait alls des erbtails gutes der mich anverstorben und angevalln ist von vater und muter sa^eligen und noch angevalln mag, laeut und gut aygen lehen purchrecht perchrecht in urbar ze holcz ze velde und ze dorffe es sei gestitt oder ungestift versucht oder unversucht, wie so das genant ist oder wa das gelegen ist, also daz ich vorgenantew Anna noch mein erben ouf denselben meinen erbtails gutes fürbas chain ansprach noch chain vordrung hawen noch gewinnen sullen umb vil noch umb wenig, sunder daz die egenanten mein pru^eder Ulreich und Rudolf von Eberstorff und irew chinde su^en und to^echter mit dem vorgenanten gu^ot allein sullen furbas ledichleichen und vreileich allen irn frumen schaffen verchauffen verseczen und geben wem si wellen an allen irresal. Es wa^ere denne daz dieselben mein pruder Ulreich und Rudolf paid abgiengen und nicht chinde liezzen weder su^ene noch to^echter, oder ob si chinde gewunnen und daz die ouch abgiengen und nicht chind hinder in liezzen weder süne noch töchter, was si denne des vorgenanten gu^otes unverchumert hinder in lazzent, daran sullen ich egenantew Anna und mein erben alles das erben und haben das wir denne durich recht daran erben und haben sullen als ander to^echter an allen chriege, und daz die furczicht und sache fürbas also staet und unczerbrochen beleibe, und wand ich selber nicht aigens insigils han, darumb so gib ich in für mich und alle mein erben den brief zu einem waren urchunde der sache versigiltem mit des vorgenanten meins wirtes insigil hern Dietmars des Rorer und mit meins o^ehaims insigil hern Perichtolts von Pergow ze den zeiten hofrichter in Oesterreich und mit meins vettern insigil hern Petreins von Eberstorff obrister chamrer in Oesterreich, und mit meins o^ehaims insigil hern Ulreichs von Pergow und mit meins swagers insigil Go^etfrids des Ro^erer die der sache gezeuge sint mit iren anhangunden insigiln, darunder ich mich oft genantew Anna verpinde mit meinen trewen an alles gever als das staet ze haben das vor an dem brif geschriben stet. Der geben ist ze Wienne nach Christes gepu^erde dreuczehen hundert jar darnach in dem siben und sechczgistem jar an unser vrowen abent ze der schidunge.

Source Fulltext: OÖUB 8 (Wien 1883), S. 334f., Nr. 342