ICH Fridreich der Stal mein hawsfrowe und all unser erben vergechen, daz wier mit rechter furczich zw chawffen geben haben unsern turen, der gelegen ist dacz Eferding in der stat an dem marcht bey der schran, mit allen ern rechten und nutzen hawsern und hofsteten chlainen und grozzen und darzw^e gehorent, versucht und unversucht nichtz ausgenomen, aus unser nutz und geber in die ieren zw rechtem chawftem gut geben haben dem edeln hochgeborm unserm genadigen lieben herrn graf Hainreichen zw Schawnberch und allen seinen erben so si die habent oder noch gewinent, umb sybntzik phunt guter wienner phenig der wir von in gantz und gar an alle schaden verricht und betzalt sein. Wir habn auch in den vorverschriben turen mit aller zwgehorung besta^ett ze rechtem chawftem gut mit aller der sta^et also des lancz recht ist daselbs. Wir sulln auch des vorverschriben chawfs ir recht gewern und furstant sein fur alle ansprach ungefarleichen an aller sta^et und in des nöt geschiecht, allz dez landes recht ist. gierig aber in an der gewerschaft icht ab, wie sich daz fuegt dez si schaden namen wie der benant war, den sullen wir in mit sambt dem hawbtgu^et an allez recht und nottaiding ganczleich wider chern. Daz in daz also unverchert beleib, geb wir in den brif versigelten mit unserm anhangundem insigel. Der brif ist geben zw Eferding in der stat do man zalt nach Christi geburd drewczechenhundert jar und in dem syben und sechczikstem jar an sand Veicz tag dez heiligen marttra^er.

Source Fulltext: OÖUB 8 (Wien 1883), S. 322f., Nr. 330