Wir Pilgreim von Gots gnaden erczbischof ze Salczburch legat des stu^els ze Rom verjehen offenlich mit disem brief, daz wir unsern hof und haus ze Lincz dem beschaiden Walchu^enn dem Cho^estlein burger ze Lincz Gerdrawten seiner hausfrown und Agnesen ir paider tohter zu iren tagen lazzen und gelihen haben mit der beschaiden, daz sev uns und unsern nachcho^emen mit demselben hof und haus mit chellern mit chaesten mit stallung und mit allem dem das zu^e dem hof geho^ert wartten su^ellen also, daz sev dhainerlay handlung in den chellern und chaesten nicht haben su^ellen uncz unser wein und traid darin cho^emen. Was denn u^ebriger cheller und gemaech sint, da mu^egen sev iren frumen wol mit schaffen. Sev su^ellen uns auch denselben hof und das haus pawen mit einer guten newen stuben mit stallung zu sechczig pfaerden mit chamern und mit ainem gu^etem dach also, daz wir unser hofmaister mit unserm gesind und dienern gu^eten gemach darinne gehaben mu^egen. Und darumb haben wir in von sundern gnaden zu demselben paw ze hilf geben zwai und dreizzig pfunt wienner pfenning, daz sew daz paw dester nu^eczleicher zu^ebringen, Volbraechten aber sev daz paw an dem hof also nicht und daz auch sev denselben hof und haus in den rechten und nu^eczen nicht innehieten als vor geschriben stet, so sint sev von allen den rechten die sev an demselben hof und haus habent gar und gancz gevallen an allev chlag und recht, und mu^egen wir und unser nachcho^emen denselben hof und daz haus lazzen und geleihen wem wir wellen und mu^egen, noch su^ellen sev und all ir erben darumb dbain ansprach hincz uns und unserm gotshaus fu^erbas nicht haben, als ir brief sagt den sev uns darumb her wider geben habent. Und daru^eber zu urchu^end geben wir fu^er uns und unser nachcho^emen disen brief versigelten mit unserm anhangundem insigel, der geben ist ze Salczburch an freytag nach sunnwenden nach Christes gepu^erd dreuczehenhundert jar darnach in dem siben und sechczigistem jare.

Source Fulltext: OÖUB 8 (Wien 1883), S. 326f., Nr. 334