Ich Walchu^on der Cho^estel purger ze Lincz Gertraut mein hausfrawe und Agnes unser baider tochter wir verjehen, das uns unser gna^ediger herre her Pilgreim erczbischof ze Salczburg legat des stu^els ze Rom seinen hof und das haus ze Lincz lazzen und gelihen hat zu^e unsern tagen, als sein brief sagt den wier von im darumb haben mit der beschaiden, das wier im und seinen nachcho^emen mit demselben hof und haus mit chellern und mit cha^esten mit stallung und mit allen dem das zu^e dem hof geho^ert warten sullen also, das wier dhainerlay handlung in den chellern und cha^esten nicht haben su^ellen uncz ier wein und traid darin cho^emen, was denn u^ebriger cheller und gema^ech wa^eren, da mu^egen wir unsern frum wol mit geschaffen. Es ist auch zu merchen, das wir unserm vorgenanten herren von Salczburg denselben hof und haus pawn sullen mit ainer gu^eten newn stuben mit stallung zu sechtzig pfa^erden mit chamern und mit ainem gu^eten dach also, das unser vorgenanter her von Salczburg und sein hofmaister mit ieren diena^ern wol dar inne gesein mu^egen, und darumb uns unser vorgenanter her von Salczburg zu^e demselben paw von besundern gnaden ze hilf geben zway und dreizzig pfunt wienner pfenning das wier das pawe dester nuczleicher volpringen mu^egen. Auch ist ze merchen, ob wier das pawe also nicht volpra^echten und das auch wier den hof und das haus mit allem pawe rechten und nu^eczen nicht innehieten als vorgeschriben stet, so sein wier von allen unsern rechten die wier an demselben hof und haws haben gar und gancz gevallen an allew chlag und an reht, und mag unser vorgenanter herr von Salczburg und sein nachcho^emen denselben hof und haus lazzen und geleihen wem sev wellent und mu^egen noh su^ellen wier darumb dhain ansprach vordrang hincz in nicht haben, das loben wier mit unsern trewen an aydes stat. Und das in das von uns sta^et und unczebrochen beleib, geben wier den offen brief versigeltn mit unsers lieben herren hern Ewerhartes von Wallse haubtmans ze Lincz anhangundem insigel, und mit meinem des egenanten Walchu^ons des Cho^estleins anhangendem insigel. Der brief ist geben ze Lincz, do man zalt von Christes gepu^erd drewczehen hundert jar darnach in dem siben und sechczigistem jar an ertag nah sunnewenden.

Source Fulltext: OÖUB 8 (Wien 1883), S. 328f., Nr. 336