Ich Wolfger von Dachsperch vergich und tün chünt, das ich verchauft han meins rechten purchrechcz ein haus gelegen auf der Renngassen ze nachst bey den Schotten und dint zwelf phennig ze gruntrecht auf das chloster daselbe dacz den Schotten und nicht mehr, dasselbs haus und was darzu gehört han ich verchauft und geben mit allen nuczen und rechten als ichs unversprechenleich inne gehabt han umb anderthalb hundert phunt wienner phenninge der ich gar und gancz gewert bin, dem erbern herren graf Ybann von Pernstain und seinen erben fürbas ledichleich und vreyleich ze haben und alln irn frumen damit ze schaffen, verchauffen, verseczen und geben wem si wellen an allen irrsal, und bin auch ich Wolfger von Dachsperch und mein erben des obgenanten haus und was darzu gehoret graf Ybans von Perstain und sein erben recht geweren und scherm für all ansprach als purchrecht recht ist und der stat recht ze Wienn. Ging in fürbas daran icht ab oder ob si mit recht icht chriegz oder ansprach daran gewunnen, das sullen wir in alles ausrichten an allen irn schaden, und sullen si das haben auf uns und unsern erben unverscheidenleich darzu^o auf alle dem gu^ot, das wir haben in dem land ze Osterreich oder wo wir es haben, wir sein lembtig oder tode. das der chauff also stet und unzebrochen weleib daruber so gib ich obgenanter Wolfger von Dachsperch disen brif ze einem waren urchund diser sache besigelt mit mein insigel und mit meins vater hern Eberharts von Dachsperch und mit meins schwager hern Albers von Pu^ochahn obristen druchseczen in O^esterreich insigel, di diser sache und des chauffs gezeug sind mit irn insigeln. der brif ist gebn nach Christi gepu^ertte dreuczehen hundt jar darnach in dem siben und sechczkisten jar an mittichen nach des heiligen chreucztag als es ervunden wart.

Source Fulltext: OÖUB 8 (Wien 1883), S. 319f., Nr. 326