Wir Albrecht von Gotes gnaden herzog ze Oesterreich ze Steyr ze Cernden und ze Crain graf ze Tyrol etc. tun chunt fuer uns und fur unsern lieben bruder herzog Leupolten, daz wir dem erwirdigen unserm lieben freund hern Albrechten bischofen ze Pazzow die genad getan haben und tun ouch wizzentlich mit disem briefe, umb welich sache die unsern hintz im ze sprechen habent, daz er sich darumb nindert anderswa verantwurten sol denne vor uns selber oder vor solichen unsern amptleuten oder herren, die wir sunderlich und mit namen darczu schaffen an allez gever; wan wir wol underweiset sein, daz sein vorvodern und er dieselben freyhayt und gnad auch also gehabt habent von unsern vorvordern. Mit urchund dicz briefs. Geben ze Wienn an suntag vor sand Thomastag des heiligen zweifboten nach kristes gepurd dreuczehenhundert jar darnach in dem siben und sechczigistem jar.

Source Fulltext: OÖUB 8 (Wien 1883), S. 355, Nr. 362