ICH Fridreich der Chamrer ab dem Chamerhof und mitsampt mier alle mein erben verjechen offenbar an dem prief, daz ich mit wolbedachtem mu^et und mit gu^etleichem willen aller meiner erben gemacht han meiner lieben hausfrawn Annen Wolfhartz des Praitenpruker fochter ze rechter margengab nach lantz recht viertzk phunt phening alter wienner munzze, dafu^er ich ier gesatzt und ingeantwurt han an phandes stat den hof auf dem Perg genant gelegen in Greymhartsteter pharr der lehen ist von meinem genedigen herren hern Ruegern von Starchenberch mit alle di und dorzue geho^ert den si nach meinem to^ed inne schol haben und nyezzen in allem dem recht alz margengab recht ist nach lantz recht, wer aver daz wier pedeu abgiengen an erben des Got nicht engeb, so schol ez herwider erben und gevallen auf mein nachst erben da ez durch recht hin erben schol nach landes recht in O^esterreich. Daz meiner obgenanten hausfrawn Annen di red also von mier und von allen meinen erben also (sic) stet und unverchert beleibe, daruber so gib ich ier egenanter Fridreich der Chamrer den prief besigelten mit meinem anhangundem insigel, und ze einer pezzern sicherhait mit meins genedigen herren hern Ruegers von Starchenberch anhangundem insigel, der dez obgenanten hofs rechter lehenherre ist und der sache damit getzeug ist im an schaden. Der prief ist geben nach Christi gepu^erd uber dreutzehen hundert jar darnach in dem acht und sechtzkisten jar des sunntags nach dem prehent tag.

Source Fulltext: OÖUB 8 (Wien 1883), S. 356, Nr. 364