Ich abbt Hans und der convent ze Paumgartenberg und unser nachchomen wir verjechen umb die vischwaid auf der Na^ern in der Awe die her Eberhart von Chappelln hauptman dacz Ens Kern Hansen sun von Chappelln dem Got genad gelassen hat pru^eder Fridrichen ze der zeit unserm undercheller ze Paumgartenberg und die emaln gehabt hat her Wetzzel von Arwing also beschaidenlich, swann das ist das der egenant her Eberhart von Chappelln oder sein erben den vorgenanten pru^eder Fridrichen die vischwaid nicht lenger lassen wellent und die vischwaid wider haben wellent und die an uns vordrend, so schullen wir oder unser nachkomen in die vischwaid wider geben unverzogenlich an chrieg und an alles gevar, und nichtz dagegen ze sprechen haben, recht als si maister Geori und her Wetzzel von Arwing in gehabt habent. Und des ze urchund und daruber so geben wir abbt Hans und der convent vor¬genant den brief versigelt mit unsern anhangunden insigeln. Der prief ist geben am na^echsten vreitag vor sand Gregorien tag des jares do man zalt von Gotes gepurt dreutzechen hundert jar darnach in dem a^echt und sechtzigostem jar.

Source Fulltext: OÖUB 8 (Wien 1883), S. 369, Nr. 374