Ich Franziscus der Grazzer von Alltnburch und all mein erben wir verjechen, daz wir unverschaidenleichen verchauft habn Hainreichen von Jedendorff und sein erbn unsers rechtn lechens mit unser pesten vreunt rat und gunst czu der czeit do wir ez wol mit recht getu^en mochten an czechen ptenig ayndlef schilling phennig gelts winner munizz di gelegen sint ze Wanch auf behaustem guet do ze den czeiten auf gesessen ist Nyclas der Peller und Niclas der Gresmer und sint ze lechen von dem edlen heren graf Ulreichn von Schawmberch, um aindlef phunt wienner phennig der wir gancz und gar gericht und gewert sein, und achczechen schilling phennig gelcz wienner munizz di gelegn sint ze Ottestal auf behaustem guet do ze den czeiten aufgesessen ist Wernhart und der Resch und auf dem Rantoltshof, und sint ze lechen von meim heren von dem elten von Ekartzaw^e mit alln den nuczen und rechtn und darczue gehört alz wirz in lechens gewer herpracht habn, um zway und czwainczig phunt phenig wienner munizz der wir auch gancz und gar gericht und gewert sein, und pin auch ich vorgenanter Franziscus und al mein erben der vorgenanten guet Hainreichs und aller sein erbn recht scherm und gewer für all ansprach und für al invell als von lechent gu^et recht ist und lands recht in Osterreich. Und daz der chauf also fürbaz stet und unczebrochn beleib, so gib ich vorgenant Franziscus für mich und für mein erbn dem vorgenantn Hainreichen und sein erbn den brif ze aim warn sichtigen urchund der vorgeschribn sach versigiltn mit meim anliangendn insigil und mit meins vetern insigil Jacobs dez Grazzer und mit Niclas insigil des Fridreicher. Der brief ist gebn nach Christes geburde drewczehen hundert jar und darnach in dem acht und sechczigisten jar des suntages nach unser vrawentag ze der liechtmess.

Source Fulltext: OÖUB 8 (Wien 1883), S. 362f., Nr. 369