Wir Albrecht und Leupolt gebru^eder von Gotes gnaden herczogen ze O^esterreich ze Steyr ze Kernden und ze Krain herren auf der windischen marich ze Phirt und ze Kyburg marggrafen ze Burgow^o und lantgrafen in Elsazze bechennen tu^en chunt und veriehen offenlich mit disem briefe allen den, die in sehent lesent oder ho^erent lesen die nu sind oder hernach in kunftigen zeitten werdent, seind der hochgeborn seliger gedechtnusse herczog Ru^odolf von O^esterreich weilent unser lieber bru^oder Got ze lobe und in ere der loblichen magt sand Mareyen seiner mu^oter und aller heiligen durch merunge gotes dienstes und durch aller unsrer vorvordern seiner und unsrer seien hailes und trostes willen ain probstey und einen tu^om vier und zwainczig korherren aufgerichtet und geordenet hat in unserer kirchen sand Stephan ze Wienn, und aber von diser welde gescheiden ist ee er der korherren phru^end bewidemt gestiftet und auzgerichtet habe, darumbe daz soliche grozze gu^ottat und erber begirde und maynunge unsers egenanten bruders volbracht werde und nicht nider gelige, haben wir mit wolbedachtem mu^ote und rechter wizzende ze den zeitten do wir das wolgetu^on mochten nach rate unserer lantherren und unsers rates und mit aller der schonheit worten und werchen die darczu^o geho^erent notdurftig und gewonlich sind dem capitel der vorgenanten korherren geben gefu^eget und verainet und redlich geben, fu^egen und verainen ouch mit kraft dicz briefs einer ewigen steten und unwiderru^efflichen gabe und vermaynunge unser mautt ze Mautthausen mit dem mautthause daselbs und mit allen nu^eczen rechten freiheitten wirden eren und loblichen gewonhaitten die darczu^e geho^erent und als unser vorvordern und wir die herbracht und gehabt haben an allez geverde. Wir geben ouch den egenanten korherren vollen gewalt und gancze macht, die vorgenante mautte mit aller zugeho^erunge ze besiczen innzehaben ze beseczen und entseczen alle nu^ecze inzenemen und damitte iren frumen ze schaffen als si getrow^een in das nucz und gut sein, und sunderlich daz si die under einander tailen und ir phru^ende davon auzrichten so verre die gelangen mugen nach ordenung unsers egenanten bru^oders seligen ane alle geverde. Ouch verhaizzen und loben wir mit disem briefe bey unsern fu^erstlichen eren und wirdichait fur uns und alle unser erben, daz wir die vorgenante gab und vermaynung ewiklich stet haben sullen und wellen und die nymer widerru^effen oder dawider tu^on mit worten noch mit werchen in dhainen weg, sunder daz wir die vorgenante mautt mit aller zugeho^erung die wir von dem reiche ze lehen haben den obgenanten korherren und der stift vertigen und bestetten sullen und wellen mit dem allerdurchleuchtigisten fu^ersten unserm lieben genedigen herren und vatter hern Karlen ro^emischen keyser ze allen zeitten merer des reiches und ko^eniges ze Behem, und daz wir si und die stift auf der obgenanten mautte auf allen den nu^eczen und rechten die darczu geho^erent endlich schirmen sullen und wellen und in daran alles gewaltes und unrechtes vor sein mit gu^eten trewn wenne und wie ofte in des not geschicht an allez gever. Und gepietten darczu^e ernstlich bey unsern hulden unserm lantmarschalich in O^esterreich unserm houbtmanne ob der Ens und allen andern unsern amptleuten und undertanen wie die genant sind gegenwurtigen und chu^enftigen, daz si die obgenanten korherren ouch darauffe schirmen und hanthaben vestiklich von unsern wegen wenne si darumbe von in oder von iren amptleuten oder gewissen botten gevordert werdent ane widerred und geverde. Und daru^eber zu^e einer ewigen zeugnusse und ganczer sicherheit hiezzen wir unser grozze fu^erstliche insigel henken an disen brief. Der geben ist ze Wienn an samztag vor sand Philipps und sand Jacobes tag der heiligen zwelfbotten nach Kristes gepurde dreuczehenhundert jar darnach in acht und sechczigistem jare. Dominus Cancellarius comes Ulricus Schow^enberg Fridericus de Walsse marschalcus provincialis Albrecht de Pucheim Heidenricus de Meissow^e Johannes de Liechtenstein de Nikolspurg et plures alij de consilio.

Source Fulltext: OÖUB 8 (Wien 1883), S. 378f., Nr. 384