ICH Dietreich von Aystershaim vergich und tu^en ku^end offenbar an disem brief allen den die in sehent oder ho^erent lesen, daz ich mit wolbedachten mu^et und mit meinem gu^etleichem willen und wort und nach rat meiner pesten freunt und meiner naechsten erben geschafft han mein gescha^efft ze der zeit da ichs wol getu^en mocht. ze dem ersten mal schaff ich ob ich von Rom herwider niht ka^em da Got vor sei, daz dann innemen sol mein hauzfrawn und mein tochter Gu^eten mein lieber pru^eder Ha^ertneid der Aystershaimer und mein lieber swager her Hanns der Chna^ewzza^er und mein lieber o^ehaim Leutel der Aespoen und mein lieber swoger Heinrich der Ga^ewman, und su^ellen si mein lieben hauzfrawn und mein tochter und all mein hab miteinander innehaben wie dev genant ist alz mirz mein vater und mein veter Heinrich und mein erstev wirtin Ku^enigu^end saeligen lazzen habent oder wie ichs in mein gewalt pracht han mit chauf oder mit satz ez sei aigen oder lehentgu^ot oder varentew hab swie die genant ist alz ichs selb inne gehabt han mit so^elicher beschaiden, daz si von erst mein seigera^et daz ich geschafft han umb meiner sel hail, vorauz richtig machen su^ellen fu^er allev dinckh wo sein not ist. Darnach so schaf ich daz man richten sol mein wirtin Efemia fu^emf hundert pfunt alter wienner pfening von meiner hab der si mir pracht hat zwai hundert pfunt pfening irr rechten haimsteur. Darzu^o han ich ir gemacht hundert pfunt ze rechter morgengab also dez lantz recht ist ob der Ens, und zwai hundert pfunt ze rechtem heiratgu^ot die sie innehaben und niezzen sol auch alz dez lantz recht ist ob der Ens, auz dem selben heiratgu^et da si prief umb hat han ich ir versatzt den Stainhof und ain gu^et in der Grub baidev gelegen in der vogtay ze Wels. Darzu^e han ich auch auz iren gu^et den weingarten der gelegen ist ze Spitz und haist die Achspeunt genomen und waz darzu^e geho^ert mitsampt dem hof der dabei leit die han ich geben zu^e meiner mezze auf sand Katherein alter, und daz sol man ir widerchern und dafu^er geben hundert pfunt pfening und den Stainhof und daz gut in der Gru^eb sol man auch lo^esen fu^er hundert pfunt, so gewingt si irev fu^emff hundert pfunt wider gantzev alz ir prief sagent, und waz anders geschafftz darinne auch geschriben wa^er dann umb daz ir selbers dinckh, daz sol alz ab sein und niht chraft haben. Ich schaff auch umb den hof ze Portz der gelegen ist in Weibora^er pfarr auf der Droetnach, daz man den selben hof vorauz vor allen dingen lo^esen sol von Go^eschlein dem Lerbelloer umb zwai und dreizzig pfunt wienner pfening und sol den antwurten dem pfarr er ze Aystershaim oder wer chu^emftiger pfarrer da ist, daz er tu^e waz mein prief sagt. So schaf ich auch mer umb (?) den prief den ich von Ha^ertlein meinem bru^eder han besunderleich u^eber alle sein hab, daz sol mein lieber swager Hanns der Gna^ewzzer und mein o^ehaim Leutel der Aespoens und mein swager Heinrich der Goewmnn, und die su^ellen zu^e in nemen meinen lieben swager hern Chraften den Hawser und su^ellen di gewaltichleich sprechen zwischen meiner tochter und meiner hauzfraun und meins pru^eder umb die schaeden die ich genomen han und umb daz gelt daz ich den O^edenburgern geben han und nach den trewn, alz er hinder mich gegangen ist und auch der selb prief sait den wir von im haben. Ich enphilch auch mer den vodern vieren, daz si mein swester die Stauffenekkerin mit etzwew meiner hab auch pas besorgen ob ich herwider niht chaem daz si und irev chind dest paz beleiben mu^egen, und si su^ellen auch meinem dienentem volich die mit mir reitent und die herwider cho^ement und die ich hie haim lazz, lon jedem mann nach seinem verdienen und nach iren trewn, und su^ellen auch vleizzig sein umb mein gelt daz man daz richt wem icht ich schuldig sei. Und daz daz allez staet und unzerbrochen beleib, daru^eber zu^e einem waren u^ercku^end gib ich vorgenanter Dietreich der Aysterzhaimer in den prief mit meinem insigel versigelten, und zu^e einer pezzern staet und zeugnu^ezz mit meins lieben pru^eder Hoertleins dez Aysterzhaimer und mit meines lieben swager herren Hansen dez Chna^ewssoer und mit meins lieben swager Heinrich dez Goewmans und mit dez erbern mans Meinhartz dez Anhanger anhangenten insigeln die ez durch meiner vleizzigen gepet willen daran gelegt habent in und iren erben an schaden, darunder ich und mein erben unz verpinden mit unsern trewn zusampt meinem insigel staet ze haben und ze volfu^eren allez daz an dem pfrief (sic) geschriben stet. Daz ist geschehen da man zalt von Christez gepu^erd dreutzehen hundert jar und darnach in dem acht und sechtzigisten jar dez samptztagz vor dem auffert tag.

Source Fulltext: OÖUB 8 (Wien 1883), S. 380f., Nr. 385