Ich Hainrich der Grans von Uttendorf und all mein erben verjehen, daz wir Ha^enslein dem Freyer seiner hausfrauen und allen im erben irgu^et datz Prunnperig daz von uns lehen ist geaygent haben zu^e dem gotzhaus gein Matichhofen also, daz wir nach der egenanten lehenschaft auf dem obgenanten gu^ot ze Prunnperig ewich leich dhain ansprach nimmer mer gehaben mugen noch sullen weder mit recht noch an recht noch mit dhainerlay sache an gever. Und ob wir in furbas dhainerlay chrieg oder irrung darinn ta^eten swie sich daz vergieng mit recht oder an recht gaistleichen oder werltleichen, daz sullen si all zeit behabt haben und wir verlorn. Swer auch den brief inn hat mit irm gu^eten willen, der hat alle di recht di an dem brief verschriben sind. Und dez ze urchu^ond geben wir in den brief mit meinem vorgenanten Hainrichs dez Granzz anhangunden insigel versigelt, darunder ich mich und all mein erben verpinden mit unsern trewn an aydez stat sta^et ze haben und ga^entzleich ze voltu^ern swaz an dem brief verschriben ist, der geben ist nach Christi gepu^ert drewtzehen hundert jar darnach in dem a^echt und sechtzkisten jar dez suntags vor sunbenden.

Source Fulltext: OÖUB 8 (Wien 1883), S. 387f., Nr. 390