Ich Gundloch Marschalk spitaler am Piren bekenn offenlich myt disem briff allen den dy in sehen horen oder lesen, daz ich dem erbergen ritter hern Cristan dem Rorrer frawen Wendellen seiner elichen wirtein und allen iren erben durch nuczze und frumen meins goczhaus und um dy getrewen dinst und furderunge di si dem vorgenanten goczhaus getan haben und noch tun sullen in kunfftigen dingen, zu rechtem erbe verleihe und verlihen den hoffe under der Steinwant genant ym Gerstental gelegen myt allen sein zugehorn nuczzen gulten rechten wi di geheizzen oder genant sein oder wa si gelegen sein, als in sein bruder vor in gehabt hat an geverde also, daz si mich vorgenanten Gundloch und mein goczhaws versprechen verteydingen und verantworten sullen zum rechten von der lehenschafft gein aller monyclich als wir (sic) ferrest mugen an geverde. Mit Urkunde diczze briffz versigelt myt meim anhangenden insigel, der geben ist an der mittichen nach seint Johannes tage dez tauffers do man zalt in dem acht und sechczigsten jar.

Source Fulltext: OÖUB 8 (Wien 1883), S. 388, Nr. 391