ICH Jacob der Mauseer ze den zeiten techent und pharrer ze Asparn pei der Zaia vergich offenlich mit disem brief umb die stifftung dez ewigen jortags und des ewigen lichtes daz mein gnediger her her Jans der Tu^ers vonn Ra^euchenek gestift und gemacht hat sand Pangreczen ze Aspern pei der Zaia, daz ich und all mein no^echchomen daz selb liecht verwesen und pelaichten schullen ewichleichen pei tag und nacht und den selbigen jortag ewichleichen pegen schullen all jor dez mantags vor sand Cholmans tag als der gemacht brief sagt den er doruber geben hat. Zu^e demselbigen jortag und zu^e dem liecht hat er gemacht und geben ain lehen gelegen ze Leizz daz do dint ain halbs phunt phenning und ainen halben mutt waicz an sand Michels tag, und dreu veld lehen ze NidernHittendorf do man vonn dint achczehen schilling phenning an sand Jorgen tag und an sand Michels tag. Auch hat er dorzu gegeben czehen schilling gelts ze dem Garmans auf ainem hof und zehenthalben schilling auch do ze dem Garmans auf einem lehen daz man auch dint an sand Jorgen tag und an sand Michelstag, und hat dorzu^e geben fumf schilling und acht phenning gelts ze ObernHittendorf auf ainem pehausten halben lehen di man dint an sand Michelstag. vonn dem vor genanten gelt allem schol ich und mein no^echcho^emen das licht ewichleichen pelaichten tag und nacht und den jortag pegen an dem vor genanten tag in solicher mozz, vonn erst schol ich und mein no^echchomen geben sechs schilling phenning umb zwelif meczen waicz vier meczen ze alter prot und acht meczen arm laiten, sechs schilling umb fünfthalben emmer wein zwen zu^e dem alter zwen emmer arm laiten ain halben emmer dem mesner und den nunnen, drey schilling umb vier phunt wachs daz man prinen scho^el ze der vigili und zu^o der selmezze, ain phunt zu^e opherphenningen daz man halbs geben schol acht pristern di an dem jortag mezz sprechen und halbs zu^o dem alter, an zwen fumfczig phenning drin pristern und dem schu^elmaister und acht phenning dem mesner vonn der vigili und vonn der selmezz. Also schol ich und mein no^echcho^emen daz liecht und den jortag ewichleich verwesen und pegen, als vor geschriben stet. Mit u^erchund des briefs versigelt mit meinem anhangunden insigel und mit dez erwierdigen gestlichen herren insigel abt Seyfrid zu^e den zeiten abt zu^e Altenwu^erch der der egenanten meiner chirichen ze Aspern lehenherr ist; und des ist auch zeug der erwer herr zu^e den zeiten Hainreich pharrer ze Stranstorf auch mit seinem insigel. Der brief ist geben nach Christi gepu^erd dreuczehen hundert jar darnach in dem neun und sechczigisten jar an dem prehen tag.

Source Fulltext: OÖUB 8 (Wien 1883), S. 403f., Nr. 408