Ich Kristan von Wazmanstorf vergich und tu^en chund offennlich mit disem brif fu^er mich selber und fu^er all mein erben, daz mich die hochgeborn fu^ersten mein lieben gnedigen herren herczog Albrecht und herczog Leuppolt herczoge ze O^esterreich ze Steyr ze Kernden und ze Krain grafen ze Tyrol etc. genczlich verricht und gewert habent vierhundert phunt wienner phenning die si mir sind schuldig beliben von des dinsts wegen den ich irm liben bru^eder herczog Rudolf seligen und in getan han wider die herczogen von Bayrn, und die si mir ouch geschalt habent an die mautt ze Lincz als der brif wol weiset den ich darumb von in han, und sag ich dieselben mein herren und ir erben des egenanten gelts und aller der scheden die ich dhains wegs in demselben dinst genomen han genczlich ledig und loz also, daz ich noch mein erben darumb hincz in noch hincz irn erben kain ansprach noch vordrung haben sullen in dhainem weg. Des gib ich ze urchund disen brif fu^er mich und fu^er all mein erben besigelten mit meinem anhangunden insigel. Geben ze Wienn an montag nach sand Veyts tag nach Krists gepu^erd dreuczehenhundert jar darnach in dem newn und sechczigistem jare.

Source Fulltext: OÖUB 8 (Wien 1883), S. 419, Nr. 424