Ich Stepheffan Geschleins sün in der O^ed und all mein erben verjehen, daz ich dem erbern mann Ulrich dem Chramer purger dacz Gmünden und seiner hausfraun und allen iren payden erben zu chauffen han geben mein mull dy genant ist dy Nider mull in der O^ed und gelegen ist in Chirchaimer pharr mit allen ern und rechten und darzu^o gehert . . . alz ichs in han gehabpt zu einem rechten vrey aigen also han ich ims geben im und allen sein erben zu einem rechten chauff umb ein gelt dez ich von iem gancz und gar gericht und gewert pin. Daz im deu red stet und unverchert von mir und von allen erben stet unverchert weleib daruber zü einem waren urchunt so gib ich im den prieff versigelt mit meiner lieben ochaim zwayer Haebichler Dietreichs und Marcharz insigel dy sy an den prief gehangen habent. wenn ich selben aigens insigel nicht han, so verpint ich mich ich vorgenanter Stephffan für mich und für alle mein erben mit meinen treun allez daz stet ze haben daz oben geschriben in den prieff, der geben ist nach Christes gepürt dreuczhenhundert jar dar nach in dem sybenczistem jar dez ffreytagz in den vier tagen.

Source Fulltext: OÖUB 8 (Wien 1883), S. 460, Nr. 464